සුදුසු වාර්තාකරණයක් ද?
වඳුරඹ සිදුවීම:
2025 ජූලි 4 වන දින අරුණ සහ දිවයින පුවත්පත් වාර්තා කළේ, වඳුරඹ නගරයේදී පාසල් සිසුවියක් පොදු වැසිකිළියකදී නිල ඇඳුම මාරු කර සිය පෙම්වතා (වඳුරඹ හෝටලයක සේවය කරන 18 හැවිරිදි තරුණයෙක්) සමඟ සිටියදී ප්රදේශවාසීන් විසින් පොලිසියට භාර දුන් බවයි. මෙම දැරිය 9 වසරේ ශිෂ්යාවකි. නීතියට අනුව, බාලවයස්කරුවන්ට නීත්යානුකූල භාරකාරත්වයෙන් බැහැරව ස්වාධීන තීරණ ගැනීමේ හැකියාවක් නැත.
සිරස්තල
අරුණ: “පාසල් යන්න ආ දැරිය නිල ඇඳුම් මාරු කර තරුණයකු සමඟ සිටියදී මාට්ටු”
දිවයින: “වඳුරඹ නොගැළපෙන පෙම් කතාවට වැසියන්ගේ තියුණු ඇස නිසා තිත: පෙම්වතා සහ සිසුවිය පොලිස් භාරයට”
මේ හරහා සිදුවිය හැකි බාලවයස්කාර අපයෝජනයක් සුළු කොට දැකීමක් සිදුවේද?
“පෙම් කතාවක්” ලෙස සරල කිරීම: වයස අවුරුදු16ට අඩු අයෙකු සමඟ සිදුවන ඕනෑම ලිංගික ක්රියාවක්, කැමැත්ත ඇතැයි කීවද, නීතිය හමුවේ බාලවයස්කාර අපයෝජනයක් ලෙස සැලකේ. “පෙම් කතාවක්” ලෙස හැඳින්වීමෙන් මෙම බරපතලකම අවම නොවේද?
වින්දිත ආරක්ෂාව නොසලකා හැරීම: මෙම සිරස්තල වින්දිතයාගේ පෞද්ගලිකත්වය සහ ආරක්ෂාවට ප්රමාණවත් අවධානයක් නොදක්වන අතර, එය සමාජයේ බාලවයස්කරුවන් අපයෝජනයට ලක්වීම පිළිබඳ සංවේදීතාව අඩු නොකරන්නේද?
වින්දිතයාට වරද පැටවීම: මෙම සිදුවීම බාලවයස්කාර දැරියගේ වරදක් බව මෙම සිරස්තලවලින් (විශේෂයෙන් පළමු සිරස්තලය) පිළිබිඹු නොකරන්නේද?
නීතිමය ප්රතිවිපාක නොපෙන්වීම: සිද්ධියේ නීතිමය බරපතලකම පිළිබඳ කිසිදු ඉඟියක් නොදීම පාඨකයාට සත්යය අවබෝධ කර ගැනීමට බාධාවක් නොවන්නේද?
මාධ්ය වාර්තාකරණයේදී, විශේෂයෙන් බාලවයස්කරුවන් සම්බන්ධ සිදුවීම්වලදී, වගකීම් සහගත හා සංවේදී ප්රවේශයක් අත්යවශ්ය වේ. සිරස්තල සිදුවීමේ නීතිමය හා සමාජයීය බරපතලකම නිවැරදිව පිළිබිඹු කළ යුතු අතර, කිසිවිටෙකත් බාලවයස්කාර අපයෝජනයන් සුළු කොට නොදැක්විය යුතුය.
මූලාශ්ර: https://childprotection.gov.lk/…/Trafficking_Manual…
https://www.unicef.org/…/file/Legal-minimun-ages.pdf…
0 Comments