එහිදී, ඇතැම් පුවත් වාර්තාවන් තුළ එම සිසුවිය “දූෂණයට” ලක් වූ බව සඳහන්ව තිබූ අතර, තවත් පුවත් සිරස්තල තුළ එම සිසුවිය “අපයෝජනයට” ලක් වූයේ යැයි සඳහන්ව තිබිණි.

ලිංගික අපරාධයක් හෝ ලිංගික අපයෝජනයක් සම්බන්ධ පුවත් වාර්තා කිරීමේදී මාධ්‍ය බොහෝ විට යොදාගන්නා “දූෂණය” යන යෙදුමෙහි මෙන්ම “කෙලෙසීම” යන යෙදුමෙහිද ඇති ගැටළුව වන්නේ, ඒ ඔස්සේ ලිංගික අපරාධයකට/අපයෝජනයකට ලක්වූ අයෙකු කිලිටි වී ඇති බවක්, නැතිනම් අපවිත්‍ර වී ඇති බවක් දැක්වීමයි.

එය, ලිංගික අපරාධයකට/අපයෝජනයකට ලක්වූ අය පිළිබඳවද තවමත් අප සමාජයේ ඇති කොන් කරන සුළු, ගර්හාත්මක ආකල්පය තවත් වැඩි දියුණු කිරීමට හේතු නොවන්නේදැයි පාඨක අප ඇසිය යුතු වේ.

ඒ අනුව, මෙම ලිංගික අපයෝජනය සම්බන්ධයෙන් වාර්තා කිරීමේදී “අපයෝජනය” යන්න වඩා සුදුසු යැයි ඔබ නොසිතන්නේද?

ලිංගික අපයෝජනයකට මුහුණ දුන් අයෙකු කොන් කරන සුළු වාර්තාකරණයෙන් වලකිමු!